FEDERACION ESPAÑOLA DE MUNICIPIOS Y PROVINCIAS
Convocadas as Eleccións Locais para o 22 de maio
O Boletín Oficial do Estado publica hoxe o Real Decreto de convocatoria das eleccións locais e ás Asembleas de Ceuta e Melilla para o 22 de maio de 2011, de conformidade co previsto na lexislación electoral. No Real Decreto quedan tamén establecidos os períodos de duración da campaña electoral.
O Real Decreto aprobado considera a convocatoria do proceso electoral para a elección de Concelleiros de municipios non sometidos a Concello Aberto; Alcaldes dos municipios que, por tradición ou en virtude de normativa autonómica, teñan adoptado o réxime de Concello Aberto; Alcaldes Pedáneos ou órgano unipersoal das entidades de ámbito territorial inferior ao municipal; Conselleiros dos Cabidos Insulares de Canarias; e membros da Asembleas das Cidades de Ceuta e Melilla.
A convocatoria dos restantes procesos electorais, anuncia o real Decreto, terá lugar a través da correspondente norma autonómica: Eleccións Autonómicas, Consellos Insulares de Baleares, Xuntas Xerais dos Territorios Históricos Vascos e Consello Xeral do Val de Arán.
Por outro lado, prevese que os Deputados das Deputacións Provinciais de Réxime Común serán elixidos unha vez celebradas as eleccións municipais, de acordo co procedemento establecido na lexislación electoral.
O texto tamén establece a duración da campaña electoral, que comezará ás cero horas do venres 6 de maio e finalizará ás vinte e catro horas do venres 20 de maio. Ademais, de acordo cos prazos previstos na lexislación electoral, este Real Decreto debe expedirse o quincuaxésimo quinto día antes do cuarto domingo de maio do ano que corresponda -neste caso, o luns 28 de marzo- e publicarse ao día seguinte -o 29 deste mesmo mes-, entrando en vigor o mesmo día da súa publicación.
O Real Decreto fora aprobado o pasado venres no Consello de Ministros no que tamén se aprobou o Regulamento polo que se regulan as condicións básicas para a participación das persoas con minusvalidez na vida política e nos procesos electorais, en cumprimento do mandato dirixido ao Goberno na Lei de igualdade de oportunidades, non discriminación e accesibilidade universal das persoas con minusvalidez.
