FEDERACION ESPAÑOLA DE MUNICIPIOS Y PROVINCIAS
Aberta a consulta do censo electoral ata o 11 de abril
O próximo 22 de maio de 2011 poderán votar nas eleccións municipais 34.567.304 electores; 19.328.936 nas eleccións autonómicas que se celebran en 13 Comunidades Autónomas e 114.584 nas Asembleas das cidades autónomas de Ceuta e Melilla. O censo electoral pode consultarse a partir de hoxe luns e ata o 11 de abril nos Concellos e delegacións provinciais da Oficina do Censo Electoral.
Os electores españois residentes no estranxeiro poderán comprobar os seus datos de inscrición nestas mesmas datas nos respectivos consulados. A consulta nos Concellos pode facerse por medios informáticos, logo de identificación do interesado, ou alternativamente mediante a exposición material das listas electorais se non se conta con eses medios.
Segundo informa o Instituto Nacional de Estatística (INE) nunha nota, o prazo para reclamar, se se observa algún erro ou omisión nos datos contidos no censo electoral, esténdese do 4 ao 11 de abril. As reclamacións poderanse presentar nos Concellos, consulados ou nas delegacións provinciais da Oficina do Censo Electoral.
Tarxetas censuais
A Oficina do Censo Electoral remitirá a cada elector unha tarxeta censual na que se lle indica a mesa en que lle corresponde votar, así como o local electoral e a dirección deste, a partir do 25 de abril.
As delegacións provinciais da Oficina do Censo Electoral atenderán as consultas sobre materias da súa competencia (inscrición no censo, voto por correo, locais electorais, tarxetas censuais, etc.) nas súas oficinas e tamén por teléfono, no número 901.101.900.
Consulta por Internet
Na páxina web do Instituto Nacional de Estatística (http:/www.ine.es) está dispoñible información sobre o censo electoral cos datos de interese para esta consulta, censo vixente, reclamacións, voto por correo, prazos, normativa legal e recontos de inscritos.
Todos os electores poden consultar os datos das mesas e locais electorais. Ademais, os electores que posúan un certificado dixital poden consultar os seus datos de inscrición no censo electoral.
