FEDERACION ESPAÑOLA DE MUNICIPIOS Y PROVINCIAS
Os municipios destinan o 25,8% dos seus presupostos a gastos non obrigatorios
O gasto non obrigatorio dos municipios españois foi do 25,8% durante o período 2004-2007. Unha media de 259,67 euros por habitante, que se dedican maioritariamente a seguridade, cultura e servizos sociais. Os datos proceden do estudo Gasto non obrigatorio dos municipios españois 2004-2007, realizado pola Deputación de Barcelona en colaboración co Instituto de Economía de Barcelona (IEB).
Os resultados deste informe, que foron presentados en Madrid polo Presidente da FEMP, Pedro Castro, e o titular da Deputación de Barcelona, Antoni Fogué, poñen de manifesto que unha cuarta parte do presuposto liquidado de Concellos, Deputacións, Cabidos e Consellos Insulares se destina a servizos e actuacións que non son da súa competencia ou que levan a cabo suplindo outras administracións. Un gasto polo que non reciben financiamento ningún.
Mediante o gasto non obrigatorio os concellos conseguen garantir a calidade, a equidade e a eficiencia nos servizos que se ofrecen aos cidadáns, garantindo o dereito a acceder a servizos similares con independencia do territorio de residencia. O gasto non obrigatorio non quere dicir que non sexa imprescindible para os cidadáns. Denomínase así aos investimentos en certos servizos segundo os tramos de poboación.
Segundo o estudo, o gasto non obrigatorio financia servizos esenciais de políticas e de funcións públicas de alto interese público e social. A proporción do gasto que os Concellos destinan a servizos non obrigatorios mantívose estable no tempo e é similar en municipios grandes e pequenos. Os ámbitos en que máis se inviste son seguridade e protección civil, cultura, promoción social e outros servizos comunitarios e sociais.
O principal destino deste gasto, segundo os autores do informe, concéntrase en catro áreas: seguridade e protección civil, queabsorbe o 29,6% do gasto non obrigatorio, cultura, que absorbe o 25,7%, promoción social, que supón o 11,9%, e outros servizos comunitarios e sociais, un 8%.
Os resultados deste estudo reflicten con claridade o problema estrutural que teñen os Concellos españois, segundo expresou o Presidente da FEMP, Pedro Castro, durante a presentación deste traballo. "Non só non recibimos un euro de forma incondicionada das Comunidades Autónomas, senón que, ademais, temos que suplir as súas carencias", afirmou.
Pedro Castro tamén sinalou que "así non se pode seguir" e que é urxente reformar tanto o sistema de financiamento como definir, con claridade, o marco competencial dos Gobernos Locais. Para iso, engadiu, hai unha condición "imprescindible e ineludible": "as Comunidades Autónomas teñen que desenvolver o mandato constitucional de contribuír ao financiamento incondicionado mediante a regulación das PICAS". Doutro modo, finalizou, o modelo institucional español quedaría coxo e sería inxusto para unha das súas partes.
Para a realización do estudo, o Instituto de Economía de Barcelona utilizou a base de datos dispoñible sobre a clasificación funcional e económica do presuposto de gastos dunha mostra de 6.664 municipios de toda España, o 82% do total, proporcionada polo Ministerio de Economía e Facenda, correspondente á liquidación dos exercicios 2004, 2005, 2006 e 2007.
Esta mesma entidade universitaria xa realizou un informe anterior similar referido á liquidación do exercicio 2003 e, agora, con este precedente, os autores traballaron coa media do período comprendido entre ese ano e o 2007.
As conclusións do novo informe sinalan tamén que o gasto non obrigatorio dos municipios españois é un gasto fundamentalmente corrente (o 79,6%), e dentro deste o destinado ao pagamento de remuneracións de persoal (41,0%). Non obstante, cabe destacar que un 18,3% do gasto non obrigatorio foi destinado a investimentos reais.
