FEDERACION ESPAÑOLA DE MUNICIPIOS Y PROVINCIAS
Declaración de Toledo pola cohesión territorial e o desenvolvemento sostible
Os pequenos municipios españois queren que o medio rural goce un tratamento diferencial de desenvolvemento con respecto ao medio urbano e que todas as Administracións fagan realicen un esforzo para atender a estes territorios dende un enfoque territorial e integral. Esta petición recóllese na Declaración de Toledo, coa que se pechou o I Congreso de Pequenos Municipios, organizado pola FEMP, ao que asistiron medio millar de Alcaldes e Concelleiros dos Concellos con menor poboación de España.
A Declaración, lida polo Presidente da Deputación de Toledo, José Manuel Tofiño, pon de manifesto que a existencia de municipios de pequeno tamaño é positiva, porque achega valores positivos como a preservación do medio ou do acervo histórico e cultural no medio rural.
O texto sinala que dende a FEMP se propiciará o desenvolvemento nas zonas rurais e, prioritariamente, nas que padecen un grao maior de atraso relativo, potenciando o desenvolvemento endóxeno do territorio, de forma que se garanta unha mellora das condicións de vida dos seus habitantes, a través da mellora das estruturas, das capacidades produtivas, dos servizos, das infraestruturas e dos valores ambientais.
Para iso, é necesario que os Gobernos locais participen activamente no proceso xunto coas demais administracións, impulsando así unha nova forma de concibir o territorio e unha nova forma de cooperación e de planificación, propiciando que as grandes cidades, as áreas metropolitanas e os municipios próximos, planifiquen o ámbito de forma coordinada, compatibilizando o crecemento co desenvolvemento sostible e a convivencia.
Propostas
Os representantes locais dos pequenos municipios propoñen, entre outras medidas, que se propicie a ampliación, estruturación e mellora dos servizos públicos no medio rural, en consonancia coa aplicación da Lei para o Desenvolvemento Sostible do Medio Rural, e que se favoreza o mantemento da poboación, potenciando unhas infraestruturas, políticas de emprego e servizos públicos suficientes, equitativos e de calidade.
Ademais, demandan que se manteña o esforzo investidor no medio rural, para equiparar o nivel de vida e de acceso ás diferentes prestacións entre os cidadáns rurais e urbanos, e que se estendan as tecnoloxías da comunicación e as infraestruturas a todas as zonas rurais para propiciar a necesaria actividade económica, profesional, cultural e social.
Ademais dunha decidida aposta pola xestión sostible, queren que se lles recoñeza e compense pola súa participación na xestión e conservación dunha parte moi importante do patrimonio natural e cultural do país e que potencie o turismo rural, como elemento dinamizador e fonte de emprego e de benestar.
Os Alcaldes dos pequenos municipios defenden o papel das mancomunidades e piden o seu fortalecemento, ao igual que o das Deputacións. Ao respecto, sinalan que as competencias que a nova Lei básica atribúa aos municipios e que non poidan exercitar os máis pequenos por falta de capacidade administrativa ou de xestión, deben ser exercitadas polas Deputacións Provinciais. Neste sentido, a deputación debe ser unha institución de cooperación cos municipios moi especializada, e debe orientar toda a súa actividade a facer efectivas as demandas municipais.
