FEDERACION ESPAÑOLA DE MUNICIPIOS Y PROVINCIAS
A FEMP impulsa o intercambio entre Gobernos Locais españois e chineses
Representantes locais de España e de China acordaron impulsar a colaboración e o intercambio entre o mundo municipal de ambos os dous países, nunha reunión do Presidente da FEMP, Pedro Castro, co Vicepresidente da Asociación de Amizade do Pobo Chinés co Estranxeiro, Li Jianping, previa ao Seminario que se celebrou na sede desta Federación.
Durante o encontro, Pedro Castro expresou a vontade de que as relacións que se establezan entre Gobernos Locais de ambos os dous países teñan, ademais dun contido cultural e de coñecemento mutuo, un contido económico, e, por iso, propuxo incorporar mesmo o mundo empresarial, no marco da política oficial de relacións que manteñen os Gobernos dos dous Estados.
O Presidente da FEMP aceptou o convite do Vicepresidente da Asociación chinesa para que unha delegación municipal española visite aquel país coincidindo coa Expo 2010 que se celebrará en Shangai.
No Seminario sobre cooperación local chinés - española que tivo lugar na FEMP, participaron 35 representantes doutras tantas cidades e provincias chinesas, así como Alcaldes e Alcaldesas españois, entre eles a Alcaldesa de Pamplona, Yolanda Barcina, e os Alcaldes de Valladolid, Francisco León de la Riva, e de Fuenlabrada, Manuel Robles. Tamén participan representantes doutros municipios como Coca (Segovia), Rivas Vaciamadrid, Villaconejos e Villanueva de la Cañada (Madrid), Riudecanyes (Tarragona), Valencia, Besalú (Girona), Málaga e da Federación Estremeña de Municipios e Provincias (FEMPEX).
O Seminario comezou coa intervención do Presidente da Comisión de Relacións Internacionais, o Alcalde de Valladolid, Francisco Javier León de la Riva, quen esbozou a estrutura terrotorial de España dende o punto de vista institucional e o papel dos Gobernos Locais.
Durante as sesións de traballo falouse do papel dos Gobernos Locais na saída da crise e sobre aspectos relacionados coa integración e a cohesión social nas cidades. O Alcalde de Valladolid destacou ao termo do Seminario que as relacións entre munícipes españois e chineses pode concretarse na cooperación mutua e o intercambio de experiencias, o coñecemento lingüístico e, mesmo, as relacións culturais e comerciais.
De la Riva explicou que xa existen experiencias de contactos bilaterais entre cidades de ambos os dous países e que se trata de aproveitar e impulsar estas relacións dentro dun marco máis xeral de colaboración.
