FEDERACION ESPAÑOLA DE MUNICIPIOS Y PROVINCIAS
O Goberno aproba o novo Rexistro Civil electrónico
O Consello de Ministros aprobou, para a súa remisión ás Cortes, o Proxecto de Lei do Rexistro Civil, que substituirá os libros físicos por unha base de datos electrónica común. Un aspecto significativo do novo Rexistro é que os Concellos actuarán non só como receptores e emisores de solicitudes, senón tamén como actores na tramitación de expedientes e a celebración de matrimonios civís.
A nova configuración do Rexistro posibilitará que as persoas non teñan que acudir normalmente ás súas oficinas, xa que a gran maioría dos trámites se realizarán directamente polas Administracións Públicas, como por exemplo o envío electrónico da información necesaria para as inscricións por parte dos hospitais (nacementos, defuncións...), dos Concellos (para os matrimonios), dos xulgados ou das notarías. Por outra parte, as certificacións poderán solicitarse e recibir por Internet.
O novo Rexistro configúrase como rexistro individual, cunha ficha persoal única, onde figurará o historial civil de cada persoa dende o seu nacemento. A partir da entrada en vigor da nova Lei, cada inscrición de nacemento irá acompañada dun Código Persoal de Cidadanía (CPC), correspondente a unha secuencia alfanumérica, que servirá para todos os trámites que o usuario precise realizar co Rexistro Civil.
Igualmente, coa nova Lei deixarán de expedirse Libros de Familia, que serán substituídos por certificacións rexistrais. Estas poderán solicitarse persoalmente ou a través de Internet. En todo caso, as Administracións e os funcionarios públicos terán acceso á información rexistral e non necesitarán pedir certificacións aos cidadáns, o cal comportará unha redución de cargas administrativas e converterá en algo extraordinario a necesidade de acudir persoalmente ao Rexistro.
O Consello de Ministros tamén aprobou un proxecto de Lei Orgánica, complementaria da Lei do Rexistro Civil, polo que se modifica a Lei Orgánica do Poder Xudicial para adaptar a regulación das atribucións dos xulgados e Tribunais en relación co Rexistro Civil á nova normativa.
