FEDERACION ESPAÑOLA DE MUNICIPIOS Y PROVINCIAS
Tokiko gobernu onaren oinarriak: konfiantza, gardentasuna eta kalitatea
Alkateek, herritarren konfiantza irabazi nahi badute, nahitaezkoa dute auzotarrei entzutea, jarduera politikoari eta kudeaketa publikoari buruzko azalpen ugari ematea, eta sare sozialen bidez komunikaziorako teknologia berriei ahalik eta etekinik handiena ateratzea. Horixe adierazi dute Iruñeko alkate Yolanda Barcinak eta Sabadelleko alkate Manuel Bustosek FEMPek etengabeko trebakuntzaren programaren barruan antolatutako «Kalitate demokratikoa eta gobernu ona» izeneko jardunaldian
Sabadelleko alkatea eta Kataluniako Udalerrien Federazioko presidentea den Manuel Bustosek adierazi zuenez, konfiantza da modu egokian gobernatzeko gakoa. Edozein administrazio publikoren gaineko ardura duenarentzat lehentasunezkoa omen da, une zail hauetan, konfiantza berreskuratzea edota mantentzea. Bere esanetan, herritarren konfiantza irabazteko, haien esanak entzutea bezalakorik ez dago, batez ere euren iritzia emateko biderik ez dutenena; alegia, «atez ate» jo eta herritarrekin harremanetan zuzenean jarriz.
Bustosen ustez, funtsezkoa da alkateak sare sozialetan egotea, «nahiz eta horretarako lanean ordu gehiago eman behar izan», eta konfiantza sortzeko edo, behintzat, mantentzeko zenbait adibide eman zituen. Bere udalerriko Gobernu Batzordean, esate baterako, oposizioko bozeramaile politikoek parte hartzen dute, eta Kontratazio Batzordean, gainera, botoa emateko eskubidea ere badute.
Ildo beretik jo du Iruñeko alkateak ere. Yolanda Barcinaren aburuz, herritarrekin aurrez aurre aritzeak areagotu egiten du haien konfiantza. Bestalde, ez omen dira ahaztu behar teknologia berriak, sare sozialak eta, beste plano batean, «aurrekontu parte-hartzaileak».
Barcina bere udalerriko auzo guztietan izan da eta dauden 700etik gora elkarteetako kideekin egin ditu bilerak. Nolanahi ere, onartu du hala jardutea errazagoa dela herri txikietako alkateentzat.
Bestalde, herritarren konfiantza eskuratzeari begira, aipatu zuen oso garrantzitsua dela udal agintarien soldatak ezartzeko irizpideak bateratzea eta, inoiz edo behin, tokiko hauteskundeetan zerrenda irekien sistema ezartzea.
«Kalitate demokratikoa eta gobernu ona» izeneko jardunaldian, FEMPen egoitzan, tokiko administrazioko ordezkariek, administrazio zentraleko ordezkariek, adituek, unibertsitateko irakasle entzutetsuek eta katedradunek hartu dute parte, gobernatzeko orduan kalitatez, gardentasunez, modernitatez eta kudeaketa kontrolatuz nola aritu behar den aztertzeko xedearekin.
