FEDERACION ESPAÑOLA DE MUNICIPIOS Y PROVINCIAS
A VI Asemblea de Cidades polo Clima conclúe os seus traballos
A VI Asemblea da Rede Española de Cidades polo Clima finalizou en Vigo coa constatación de que os Gobernos Locais que a integran están decididos a adoptar unha posición firme sobre a mobilidade eléctrica e impulsar unha "aposta decidida" por reducir as emisións contaminantes.
O Alcalde de Vigo e Presidente da Rede, Abel Caballero, realizou un balance positivo dos dous días de reunións, nas que participaron representantes de máis de cen municipios españois e se debateu sobre a implantación do vehículo eléctrico con responsables da Oficina Española de Cambio Climático, do Ministerio de Industria, do IDAE e de Rede Eléctrica Española. Os Concellos de Gijón, Málaga, Sevilla, Barcelona e Vigo presentaron as experiencias locais nesta materia.
O alcalde vigués afirmou que o evento celebrado deixa a "convicción" de que os responsables municipais están dispostos a dar facilidades ao uso do vehículo sostible, tanto fiscais coma de estacionamento e recarga. As localidades tamén avogan por que as pequenas reparacións a efectuar no centro das cidades que necesiten transporte sexan realizadas "practicamente a concesión exclusiva" por automóbiles industriais eléctricos, segundo explicou.
Igualmente, Abel Caballero defendeu "dar o máximo de facilidades á creación de empresas que establezan a distribución e a xestión da carga dos automóbiles eléctricos e despois facer que os aparcadoiros públicos ou privados en concesión teñan xa todas as características de carga".
O Presidente da Rede da FEMP apuntou ademais que a Asemblea celebrada na súa cidade consolida "un primeiro paso de xigante" dos municipios para a implantación efectiva do coche eléctrico. Caballero adiantou ademais que Vigo participará activamente na elaboración dunha ordenanza municipal piloto que regule o uso deste vehículo, xunto co IDAE e a propia Rede que preside.
Experiencias municipais
As experiencias de Barcelona, Vigo, Sevilla, Málaga ou Gijón no desenvolvemento e implantación do coche eléctrico nos seus respectivos municipios centraron os debates da segunda e última xornada de traballo das Xornadas celebradas en Vigo.
Interviñeron, entre outros, o Tenente de Alcalde de Medio do Concello de Barcelona, Inma Mayol Beltrán, para explicar a experiencia barcelonesa, e o Concelleiro de Xestión Municipal de Vigo, Carlos López Font, para expoñer a estratexia de promoción do vehículo eléctrico nesta cidade. Posteriormente, nunha Mesa Redonda, participaron representantes dos Concellos de Sevilla, Málaga e Gijón, exemplos pioneiros nos seus respectivos proxectos "Movele", "SmartCity" e "Living Car Gijón".
Ademais das experiencias municipais, os asistentes ás Xornadas puideron coñecer cal é o impacto do vehículo eléctrico nas emisións de GEI, os detalles da Estratexia Integral do Vehículo Eléctrico, as "redes intelixentes: o vehículo eléctrico como batería", ou as medidas de impulso destes coches, da man de representantes dos Ministerios de Medio, de Industria, de Rede Eléctrica de España e do IDAE. A voz dos construtores púxoa o Director do Centro de Vigo de PSA Peugeot Citröen.
