FEDERACION ESPAÑOLA DE MUNICIPIOS Y PROVINCIAS
Acordo político para a presentación de candidaturas de consenso á 10 Asamblea
O PP e o PSOE chegaron a un acordo para presentar unha candidatura conxunta aos órganos reitores da FEMP, de cara á 10ª Asemblea desta Federación que comeza mañá sábado, 24 de setembro en Madrid. Os responsables de política municipal de ambos os dous partidos, Juan Manuel Moreno Bonilla (PP) e Antonio Hernando Vara (PSOE) coincidiron en que este acordo, que vai máis alá da presentación dunha candidatura única, irá en beneficio da FEMP e de todos os municipios españois.
Os dous partidos presentarán candidaturas conxuntas á Comisión Executiva, que a partir de agora se denominará Xunta de Goberno, ao Consello Territorial, nova denominación do anterior Consello Federal, e ás distintas Comisións Sectoriais de Traballo. Igualmente, consensuaron a composición da Mesa da 10ª Asemblea.
Os termos do acordo foron presentados en rolda de prensa polo Coordinador de Política Municipal e Autonómica do Partido Popular, Juan Manuel Moreno Bonilla, e o Secretario de Cidades e Política Municipal do PSOE, Antonio Hernando Vera.
Moreno Bonilla explicou que este "grande acordo político" entre as dúas forzas máis representativas do poder municipal implicará unha reestruturación da FEMP para que sexa un "instrumento útil ao conxunto dos municipios e dos cidadáns". Do mesmo modo, sinalou que se trata de abrir unha nova etapa caracterizada polo diálogo e o consenso, para potenciar o carácter da FEMP como interlocutor único coas distintas administracións, especialmente coa Administración Xeral do Estado. "Dende a FEMP podemos contribuír a dar solucións audaces e intelixentes aos problemas dos municipios".
O representante do PP informou, ademais, de que a este acordo se sumaron outras formacións como CiU, PAR e UPN. Espérase que se incorporen Esquerda Unida e o Partido Andalucista.
Antonio Hernando destacou que os dous partidos quixeron poñer de relevo as súas coincidencias, porque a FEMP "é de todos"; e engadiu que o acordo tamén pretende manifestar a pluralidade política e territorial do municipalismo español, que "está por enriba das nosas diferenzas políticas". "O acordo faise dende a responsabilidade e é unha boa base para o futuro", engadiu
