FEDERACION ESPAÑOLA DE MUNICIPIOS Y PROVINCIAS
Constituída a Plataforma para o fomento da rehabilitación, con participación da FEMP
Goberno central, Comunidades Autónomas, FEMP, sindicatos, asociacións patronais, colexios profesionais, entidades financeiras, CERMI e representantes de consumidores e usuarios, entre outros, integran a Plataforma Social RHÉ+, que acaba de constituírse co obxectivo de facilitar e fomentar a rehabilitación de vivendas.
A Plataforma Social para o fomento da Rehabilitación, a Accesibilidade e a Eficiencia enerxética de edificios e vivendas (Plataforma RHÈ+), é un foro co que se pretende involucrar a todos os sectores e administracións implicados na rehabilitación, a accesibilidade e eficiencia enerxética de edificios e vivendas xa construídos.
A Ministra de Vivenda, Beatriz Corredor, explicou a importancia de enviar á sociedade a mensaxe de compromiso de todos coa rehabilitación, porque o futuro máis sostible está en "estreita relación cun modelo urbano que prime a rexeneración da cidade consolidada e a rehabilitación de vivendas, edificios e barrios, con fogares menos contaminantes e enerxeticamente máis eficientes, e, por suposto, máis confortables".
Corredor sinalou que se trata de fomentar non só a sostibilidade da edificación dende o punto de vista enerxético, senón tamén dende o punto de vista económico. Tamén recordou o "inmenso campo de actividade económica e de xeración de novos empregos que ofrecen a rexeneración urbana e a rehabilitación". Segundo apunto, por cada millón de euros invertidos, xéranse máis de 50 postos de traballo, por iso, temos a obriga de aproveitar este inxente potencial económico" nun país no que a metade do parque edificado supera os 30 anos de antigüidade.
A Ministra referiuse ás oficinas de rehabilitación, creadas xa en moitas cidades, financiadas coa colaboración de todas as administracións e que poden ser complementadas dende o sector privado. "Estas oficinas xogan un papel fundamental como punto de encontro entre os técnicos, as empresas e os cidadáns, facilitando unha asistencia directa, persoal e cualificada", engadiu.
Por último, comentou "a escrupulosa lealdade institucional" e a coordinación coas Comunidades Autónomas e os Concellos, necesarias para alcanzar estes obxectivos.
Compromisos da Plataforma RHÈ+
. Aboar as subvencións establecidas nos programas de rehabilitación no prazo máximo de dous meses dende a terminación das obras.
. A creación de rexistros voluntarios de empresas homologadas RHÈ+ para a realización de obras de rehabilitación.
. Promover a concesión das licenzas de obra menor no prazo dun mes e axilizarase a concesión das licenzas mediante o uso de medios telemáticos
. Creación dun portal web específico.
. Ampliar a formación de traballadores, axentes, técnicos e empresas nas novas tecnoloxías que fan posible a rehabilitación.
. Creación de Oficinas Técnicas de Rehabilitación nos Colexios Oficiais de Arquitectos, de Aparelladores e Arquitectos Técnicos e naquelas zonas e barrios onde os Colexios e os Concellos as consideren necesarias para mellorar o estado das edificacións e a calidade de vida dos seus habitantes.
Integrantes da Plataforma
Ministerios de Industria, Turismo e Comercio (IDAE) e de Sanidade e Política Social (CEAPAT), Comunidades e Cidades Autónomas, a Federación Española de Municipios e Provincias, as organizacións sindicais CCOO e UGT, as patronais CEOE e CEPYME, a Unión de Profesionais e Traballadores Autónomos (UPTA), os Colexios Oficiais de Arquitectos e de Aparelladores e Arquitectos Técnicos, a Confederación Nacional da Construción, as Federacións de MCA-UGT e FECOMA-CCOO, a Fundación Laboral da Construción, a Confederación Española de Asociacións de Fabricantes de Produtos de Construción, o ICO, a Asociación Española de Banca e a Confederación Española de Caixas de Aforro, a Federación de Asociacións de Consumidores e Usuarios, os Colexios de Administradores de Terreos, os Colexios dos Axentes da Propiedade Inmobiliaria, o CERMI e o Consello da Xuventude..
